AFD 10.  “DAAR IS NIE MEER MAN EN VROU NIE” IN GAL 3:28

Daar is nie [meer] Jood of Griek nie, daar is nie [meer] slaaf of vryman nie, daar is nie [meer] man en vrou nie; want julle is almal een in Christus Jesus.  Die “nie meer” is dikwels gebruik as bewys dat die  vrou “nie meer” ondergeskik is aan die man soos in die Ou Testament nie.  Hulle is nou gelyk.  Die woord meer staan egter nie in die grondteks nie.  By die vertaling is twee sake oor die hoof gesien:  (1) Gelykheid voor die gereg van God en (2) eenheid deur die gemeenskaplike geloof.

10.1  Gelykheid voor die gereg van God

Man en vrou is nie ongespesifiseerd gelyk nie, maar “gelyk voor die gereg van God” oor verbonds-trou en verbondsafval.  Dié beginsel verseker dat die Regter en sy regters ¹2 Kron 19:6-7  regverdig oordeel.

Hierdie regsreël is bekend in die Ou Testament (en in baie grondwette, byvoorbeeld art 9 (1) van die grondwet van Suid-Afrika:  Elkeen is gelyk voor die reg en het die reg op gelyke beskerming en voor­deel van die reg).  In die Ou Testament moes Israel klein sowel as groot in die gereg aanhoor ²Deut 1:17  en nie die geringe of die aansienlike voortrek nie, ³Lev 19:15  want die HERE is die grote God wat die persoon nie aansien nie. ⁴Deut 10:17   By Hom is geen onreg of partydigheid nie. ⁵2 Kron 19:7; Deut 16:19   Hy is die Regverdige wat die vorste nie voortrek nie en op die vername nie meer ag gee as op die arme nie; want hulle almal is die werk van sy hande. ⁶2 Kron 19:7; Deut 16:19  Job 34:19   Die vertaling moet wees “daar is nie” met weglating van die “meer” soos in Kol 3:11.

Die regsbeginsel: geen aanneming van die persoon nie (Deut 10:17) kom ook dikwels in die Nuwe Testament voor. ⁷Matt 22:16; Hand 10:34; Rom 3:22; 10:12; Gal 2:6; Ef 6:9; Kol 3:11, 25; Jak 2:1; 1 Petr 1:17   Paulus gee ‘n uiteensetting daarvan in Rom 2:5-11:

•      2:5-6:	In sy regverdige oordeel sal God elkeen vergeld na sy werke.
•      2:8+9:	Vir elke mens (Jood en Griek) wat kwaad doen, verdrukking en benoudheid.
•      2:7+10:	Vir elke mens (Jood en Griek) wat goed doen, heerlikheid en eer en vrede.
•      2:11:	Want daar is geen aanneming van die persoon by God nie.
•      2:9+10:	Hy neem ook sy verbond in ag: vir die Jood eerste en ook vir die Griek.  Die seën en die vloek begin by die verbondsvolk. 8Deut 28:3, 16; Eseg 9:6; 1 Petr 4:17

Die veelvuldige gebruik van wet en geregtigheid plaas Gal 3 in die regsfeer.  Goed en kwaad doen is die dade uit die Gees en uit die vlees, ⁹Gal 3:3; 6:5  die soek na geregtigheid uit wetswerke ¹⁰15 x wet in Gal 3  teenoor die belydenis van geregtigheid uit die geloof in Christus wat aan die eise van die wet voldoen het. ¹¹14 x geloof in Gal 3

In Rom 2, Gal 3 en elders word dié regsbeginsel met antonieme pare geïllustreer:  Jood en Griek, slaaf en vryman, man en vrou, klein en groot, gering en aansienlik, vernaam en arm, heer en kneg, ryk en arm.  Die antonieme wys op ongelykhede en verskille in gawes en roeping. ¹²1 Kor 7:17-24  Die ongelykhede is nie die saak waaroor die Regter se uitspraak handel nie.

Die saak in geding is die dade, die nakoming van al die bepalings van die verbond (Gal 3:10; 5:3).  Wie kan dan ontkom aan sy toorn?  Slegs Jesus Christus was volmaak gehoorsaam en saam met Hom almal wat deur die geloof in Hom ingeplant is. ¹³Rom 11:20

10.2  Eenheid deur die gemeenskaplike geloof

Almal wat een is in Gal 3:28 is almal wat kinders van God is deur die geloof in Christus (3:26), wat ook al hulle eienskappe, gawes en roeping mag wees.  ‘n Primêre opdrag aan mans en vroue is om die gepredikte Woord oor Jesus Christus te glo (Gal 3:2, 5).  Man en vrou word vrygespreek op grond van die gemeenskaplike geloof wat vrugte dra.  Met hulle ongelykhede en al is hulle een in Christus (3:28), is hulle van Christus, die nageslag van Abraham en erfgename van die belofte (3:29).

Man en vrou is gelyk voor die gereg van God wanneer Hy oordeel oor verbondstrou en verbonds-afval en nie oor hulle ongelykhede as man en vrou nie.  Hulle eenheid is die gemeenskaplike geloof dat die regsgrond vir hulle vryspraak die werke van die manlike Jesus Christus is.